موقع شهيواتي يقدم لكم: لاداند بالكريم فريش والشمبنيون
السلام عليكم؛
اليوم حضرت لاداند بالكريم فريش والشمبنيون وجات غزالة ومخداتش وقت كبير فالطهي
ندوزو للمقادير:
لاداند: اللي بغيتي او المتوفر عندك؛
علبة القشدة الطرية
علبة ديال الفطر
بصلة كبيرة مشلظة ملح إبزار زبدة عوض الزيت لانها تتبنن احسن من الزيت
الطريقة:
في مقلاة نديرو البصلة المشلظة وشوية ديال الزبدة والملح والابزار ونخليوها تتصهد على نار متوسطة،
مللي تاخذ ذاك اللون الباهت ، نزيدو ليها لاداند ديالنا اللي قطعناه طريفات صغار، ونحركو مرة مرة ونزيدو شوية الزبدة مللي توكح منها
من بعد نزيدو الفطر، ونزيدو شوية الزبدة ونغطيوها شوية تدخل فالطياب ومرة مرة نطلو عليها باش ماتحرقش؛ على العموم ماتاتخذش وقت طويل
من بعد مللي نحسو بيها طابت نزيدو القشدة الطرية ونخليوها عريانة باش تتختر ونشوفو قياسنا ديال الملح والابزار الا كان خاص شوية الزيادة وهاهي مللي وجدات ،
انا رافقتها بعصير الاڤوكا، وممكن اي عصير خفيف حينت تتجي عاقدة شوية، ممكن تتكال بالخبر وممكن تسلق ليپاط وتتصب فوقها عوض الخبز
وبالف صحة وعافية