بسطيلة بالحوت مممم اجيو تشوفو راه بالصور و بالتفصيل
سلام عليكم و رحمة الله تعالى و بركاته
البارح درت بسطيلة للغداء انا و راجلي وجات لديييييييدة وبنيييييينة متشبعوش منها
المقادير
نص كيلو قمرون + رابعة كلمار+ 2 فيلي panga حوت أبيض معرفتش كيسميتو بالعربية+
100 غ شعرية الصينية +معدنوس+ملح +بزار +تحميرة+كمون +سكين جبير+خرقوم+زعفران ملون( زبدة و بيضة للدهن الورقة) ثم ورقة البسطيلة العدد على حساب المول.
الطريقة :
اولا: رقدت الشعرية فالماء الساخن حتى رطابت وخليتها فشبكة حتى استقطرت
2: شرملتpanga بالملح وبزار تحميرة كمون سكين جبير ودرتو يطيب فالفرن حتى نشف من الما ديالو وتحمر خرجتو يبرد وقطعتو
3: فمقلة درت زيت تسخن درت الكلمار مقطع علا جوج يتقلي زدت عليه 2 دروس ثوم مشلضين وزدت كروڤيت والمعدنوس والعطرية الملح مكترتش حيت كل حاجة كنملحها بحدها+ كمون بزار سكين جبير وتحميرة خليتهم حتا طابو وبردو وخلطت الحوت و الشعرية ومعدنوس ، فرشت صينية مستطيلة صغيرة بورق سيلفيريزي وبديت نفرش الورقة وانا كندهن كل وحدة بالزبدة مدوبة حتى دورتها كلها علا صينية وزدت وحدا فوق منهم درت الحشوة فالوسط وبديت تغلق البسطيلة وانا كندهن بالبيض حتى ساليت دهنت ورقة وزدتها الفوق باش يتقاد شكل خديت جوج ورقات دهنتهوم وقطعتهم اشريطة وزوقتعوم من الفوق زواق عشوائي ودهنتها بالبيض من الفوق دخلتها للفرن طيب من التحت حتا طابت ورجعتها تحمر من الفوق زينتها بلكروڤيت مقلي والخص والحامض نخليكم مع الصور توضحلكم
راه جات فعلا زوينة وبنينة و اهم شيء نآآآآاشفة مميدماش مضحكوليش على سلاطة المزركشة
وصفات متنوعة مجلة الوصفات المتنوعة لكل ما يهم المرأة العربية
