غريبة البهلة بطريقة جد سهلة ومجربة

موقع شهيواتي يقدم لكم: غريبة البهلة بطريقة جد سهلة ومجربة

 غريبة البهلة بطريقة جد سهلة ومجربة

المقادير:

1 كيلو دقيق الفورص

رابعة السكر كلاصي

رابعة الزبدة دالعبار

قبيصة الملح

راس المعلقة مسكة حرة

الزيت على حسب الخليط

نصف رابعة جنجلان محمر

نصف رابعة لوز مفسخ و مقلي و مهرمش

3 خمارات الحلوة

كيف كتعرفوا كلكم أنه سر نجاح غريبة البهلة هو الدليك إلا بغيتيها تجيك هشيشة و كتدوب فالفم خاصك ما تكتريش ليها الزيت و تدلكيها مزيان حتى يدخل الزيت فالدقيق و تليان باش تقدري تكوريها…اليوم جبت ليكم طريقة كتسهل عليكم بزااااف و النتيجة مضمونة إن شاء الله…

الطريقة:

 نغربل الدقيق و السكر كلاصي فالقصعة نزيد شوية الملح و المسكة الحرة و الزبدة نخلطو بأطراف الأصابع و نفرك الزبدة مع خليط الدقيق و السكر حتى ندخلها فيه مزيان عاد نبدا نزيد الزيت و أنا كنخلط و ما نكترش غير القياس اللي يبسس الخليط  نخلطها مزيان و بلا دليك بلا عداب ندير الخليط  فالكوكوط  نسد الكوكوط وخليها فشي قنت فالكوزينة على الأقل 24 ساعة و كلما زادت المدة كتجي أحسن ملي تدوز المدة تحلي الكوكوط غتلاحظي أن العجينة رطابت نعملها فالقصعة تاني و نزيد عليها جنجلان و اللوز و نخلط مزيان و في الأخير نزيد الخميرة نخلطها مزيان و إلا كانت باقية كتفتت ندلكها غير شوية و هدا شكلها نكورها بكل سهولة و ندخلها لفران مسخن و نشعل عليها غير من الفوق فالأول واحد 5 دقائق عاد نشعل من التحت و نخليه مشعول من فوق و هدا شكلها ملي خرجناها من الفران كتجي هشيشة و كتدوب فالفم أما المداق غنخليكم تكتشفوه

 

 اللهم أدمها نعمة و بارك لنا فيها و إحفظها من الزوال اللي جرباتها و عجباتها أمانة عليها تدعي معايا شي دعوة الخير فهاد الأيام المباركة و ربي يجازيها بأحسن من دعواتها