السلام عليكم ورحمة الله وبركاته
موقع شهيواتي يهدي هاد العصير لجميع الانيقات عموما نتمنى يعجبكم إن شاء الله في الحقيقة حنا هاد هو العصير باش دوزنا رمضان كلو تقريبا كأساس يعني ماشي بوحدو كنضيفو ليه اي فاكهة موجودة في الثلاجة وأستسمح كنت باغا نحطو ليكم في البداية ديال رمضان باش تستافدو منو ولكن ماكنتش كنلقى الوقت عارفة راسي الى دخلت لموقع شهيواتي خاصني ديباناج باش نتزعزع منو هههههههههه داك الشي علاش ماكندخلش بزاف المهم بلاما نبقى مصدعاكم هاهما المقاديرعينكم ميزانكم فيهم انا غادا نعطيكم داك الشي غير تقريبي والطريقة بسم الله
2,5 كلغ الى 3 كلغ ليمون مقشر حامضة كبيرة شوية كمية وافية من السكر ضروري طوب كيجي احسن من السنيدة قشرة 2 ليمونات نحاولو ما امكن غير القشرة الليمونية حجرة الليم او حمض السيتريك او السنيدة الحامضة
كل واحد وكيف كيسميها معلقة صغيرة وهاد هو السر باش كتحافظ عليه وكيبقى مدة طويلة والماء بطبيعة الحال
الطريقة: المهم كتقشرو كلشي "الحامض والليمون" وتحيدو العظومة والى الكوكوط ههههه كضيفو القشرة والسكر والماء
الماء الكمية اللي تغطي ليك المقادير
كتقفلو الكوكوط وتخليوها حتى تغلى وتنقصو العافية حتى الحد الادنى باش مايسيحش وتحسبو تقريبا 20 حتى 30 دقيقة وتطيفيو البوطة وتعملوه في اناء كبير
ثم تضيفو ملعقة صغيرة حجرة الليم كتعطيه الحموضة وكتحافظ عليه
حتى يبرد عاد نطحنوه ونصفيوه
ونبداو نضيفو الماء تقريبا 9 لتر على حساب
نعملوهم في قراعي ونعملوهم في الفريكو والوقت اللي بغيتيه كتخرجيه وكتخليه حتى يتطلق وضيفو ليه اي فاكهة موجودة عندكم او تعملو بيه كوكتيل
هاهو هنا صورتو بدون اضافة اي فاكهة