سلام عليكم و رحمة الله و بركاته
موقع شهيواتي لكل ما يهم المرأة المغربية يقدم لك سيدتي مقادير الدجاج مشرمل بالطريقة التقليدية
المكونات و طريقة التحضير :
بالنسبة للشرمولة
معلقة عامرة ملحة
نص معلقة ابزار
معلقة قرفة
معلقة اسكنجبير
معلقة تحميرة
الخرقوم معلقة صغيرة
الزعفران شعرة أو ضامة ديال الزعفران
كنديرو كلشي فبانيو أو سلاديي
كنزيدو عليهم القزبور مقطع رقيق
التومة 5 حتى ل6 فصوص ممعوسين مزيان
شوية ديال الماء
كنشرملو الدجاجات وحدة وحدة
كنخدو الطنجرة كنديرو فيها كاس عنبة عامر زيت عادية
و ندروها فوق العافية و نزيدو 3 بصلات حتى ل4 مقطعين جوانح
كنحطو الدجاجات فوق البصلة
كنقلبو الدجاجات مرة مرة و نزيدو شوية ديال الماء حتى يطيبو
ملي بطيب الدجاج كنحيدوه و نزيدو الزيتون و الحامض مصير فالمرقة لي عندنا
كنخليو المرقة ديالنا حتى تختر و ما يبقاش فيها الماء نهائيا
كنردو الدجاج للطنجرة فوق المرقة باش يسخن معها
و نقدمو الدجاج فطبسيل او طاجين مع الدغميرة و الزيتون
بالصحة و الراحة